تۇركيا ءمينيسترى بىشكەكتى گۇلەننىڭ جاقتاستارىنا قارسى شارا قابىلداۋعا شاقىردى
تۇركيا سىرتقى ىستەر ءمينيسترى مەۆليۋت چاۆۋشوگلۋ قىرعىزستان بيلىگىن وپپوزيتسيالىق ءدىني قايراتكەر فەتحۋللا گۇلەننىڭ جاقتاستارىنا قارسى شارا قابىلداۋعا شاقىردى. مينيستر بۇل تۋرالى انتاليادا وتكەن دەموكراتيانى قولداۋ اكتسياسىندا ايتقان.
چاۆۋشوگلۋ تۇركيادا شىلدەنىڭ 16-سى قاراعان ءتۇنى مەملەكەتتىك توڭكەرىس جاساۋ ارەكەتىن ۇيىمداستىرعانداردىڭ بارلىعى جاۋاپقا تارتىلادى دەگەن.
سونىمەن بىرگە ول تۇركياعا الەمنىڭ بىرقاتار ەلدەرىنىڭ ۇكىمەتتەرى قولداۋ تانىتقانى تۋرالى مالىمدەگەن. ونىڭ سوزىنشە، بۇل ەلدەر گۇلەنگە قانداي دا ءبىر قاتىسى بار ۇيىمداردى جابادى. ول ەلدەردىڭ قاتارىندا الگى جابىلعان مەكەمەلەردى تەررورلىق ۇيىم دەپ تانىعان سومالي مەن سولتۇستىك كيپر اتالدى.
«گۇلەننىڭ جاقتاستارى قىرعىزستاندا نىق وتىر. ەگەر ولارعا قارسى ەشقانداي ءتيىستى شارالار قابىلدانبايتىن بولسا، وندا سىزدەرگە دەگەن قاتىناسىمىز وزگەرۋى مۇمكىن ەكەنىن ايتقىم كەلەدى. ءبىز باۋىرلاس ەلدەردەن تەك وسىنى عانا سۇرايمىز. ءبىز كۇردەلى جاعدايعا تاپ بولعان شاقتا باۋىرلاس ەلدەر شەتتە قاراپ وتىرماۋى كەرەك»، – دەگەن چاۆۋشوگلۋ.
شىلدەنىڭ 16-سىنا قاراعان ءتۇنى تۇركيادا اسكەري توڭكەرىس جاساماق بولعانداردىڭ ارەكەتى ساتسىزدىككە ۇشىراپ، بيلىك بۇلىكتى باستى. بۇلىككە قاتىسى بار دەگەن كۇدىككە ىلىنگەن بىرنەشە مىڭ ادام، سولاردىڭ اراسىندا جوعارى لاۋازىمدى وفيتسەرلەر، شەنەۋنىكتەر مەن سۋديالار قاماۋعا الىندى. بۇدان سوڭ ەلدە 43 مىڭنان استام جەكە مەنشىك مەكتەپ، مىڭنان استام قور، وتىز شاقتى دەنساۋلىق ساقتاۋ مەكەمەسى جانە 15 جوعارى وقۋ ورنى جابىلعان. ولار گۇلەننىڭ جاقتاستارىمەن بايلانىستا بولعان كۇدىككە ىلىنگەن.
تۇركيا بيلىگى مەملەكەتتىك توڭكەرىس جاساماقشى بولعانداردىڭ ارتىندا قازىر اقش-تا تۇرىپ جاتقان ىقپالدى ءدىني تۇلعا – فەتحۋللا گۇلەن تۇر دەپ سانايدى. رەسمي انكارا ونى تۇتقىنداپ، تۇركياعا قايتارۋدى تالاپ ەتىپ وتىر. فاتحۋللا گۇلەن تۇركياداعى اسكەري توڭكەرىس جاساۋ ارەكەتىن ايىپتاپ، وزىنە انكارانىڭ تاققان ايىبىن ءۇزىلدى-كەسىلدى جوققا شىعارعان.
ازات ەۋروپا / ازاتتىق راديوسى
پىكىر قالدىرۋ