Riodağı qazaq boksşılarınıñ qarsılastarı anıqtaldı
Bokstan Rio olimpiadasındağı jarıs jerebesi tartıldı. Azattıq tilşisiniñ habarlauınşa, qazaqstandıq Birjan Jaqıpov (49 kg) jarıstı ekinşi aynalımnan bastaydı. Ol Matias Namuniela (Namibiya) men Rufat Huseinov (Äzerbayjan) arasındağı jekpe-jektiñ jeñimpazımen kezdesedi.
Oljas Sättibaev (52 kg) birinşi aynalımda puerto-rikolıq Hav'er Kintrondı jeñse, 2015 jılğı älem çempionı äzerbayjandıq Elvin Mamişzademen ringke şığadı. Qayrat Eraliev (56 kg) 2013 jılı Almatıda ötken älem çempionatınıñ jeñimpazı äzerbayjandıq Javid Çelebievpen kezdesedi. Eraliev Almatıdağı älem çempionatınıñ jartılay finalında osı boksşıdan jeñilgen.
Berik Äbdirahmanov (60 kg) alğaşqı aynalımda amerikalıq Karlos Val'deraspen kezdesedi. Abılayhan Jüsipov (64 kg) birinşi jekpe-jeginde wlıbritaniyalıq Pet Makkormakpen sayısqa tüsedi. Onıñ jeñse, kubalıq Iasnel' Toledomen bokstasadı.
Daniyar Eleusinov (69 kg) jarıstı ekinşi aynalımnan bastaydı. Onıñ alğaşqı qarsılası Djoş Kelli (Wlıbritaniya) men Ualid Mohammad (Egipet) arasındağı jekpe-jekte anıqtaladı. Jänibek Älimhanwlı (75 kg) alğaşqı aynalımda wlıbritaniyalıq Entoni Foulermen kezdesedi.
Ädilbek Niyazımbetov (81 kg) ekinşi aynalımda Valentino Manfredonio (Italiya) men Mihail Dolgolevec (Belorus') arasındağı jekpe-jek jeñimpazımen jwdırıqtasadı. Vasiliy Levit (91 kg) ekinşi aynalımda qıtaylıq YU Fenkaymen bokstasadı.
+91 kilogramm salmaqta Ivan Dıçko birinşi aynalımdı attap ötedi. Onıñ qarsılası Magomedrasul Medjidov (Äzerbayjan) pen Mohamed Ardjoui (Marokko) arasındağı kezdesude anıqtaladı. Dıçko 2013 jılı Almatıdağı älem çempionatınıñ finalında Medjidovtan nokdaunmen jeñilgen.
Äyelder arasında Jayna Şekerbekova (51 kg) ekinşi aynalımda marokkolıq Zahra Ez-Zahraui men franciyalıq Sara Ourahmon arasındağı kezdesudiñ jeñimpazımen bokstasadı.
Dariğa Şäkimova (75 kg) birinşi aynalımda 2008 jılğı älem çempionı kanadalıq Ariana Fortinmen ringke şığadı.
Rio olimpiadasındağı boks jarıstarı 6-21 tamız arasında ötedi.
Ruslan MEDELBEK
“Azattıq” radiosı
Pikir qaldıru