Qırküyektiñ 28-i küni Niderlandtağı N'yuvegeyn qalasında Halıqaralıq tekseru tobı 2014 jılı Ukrainanıñ şığısındağı Doneck oblısında atıp tüsirilgen Malayziyağa tiesili MH17 reysti Boeing 777 jolauşılar wşağına qatıstı tergeu qorıtındısın baspasöz mäslihatında jariyaladı. Tekseruşiler jolauşılar wşağına zımıran Snejnoe qalasınan altı şaqırım jerdegi Pervomaysk eldi mekeninen atılğanın mälimdedi. Bwl aymaq 2014 jıldan beri reseyşil separatisterdiñ baqılauında. Tekseruşiler keltirgen dälel boyınşa, zımıran atatın “Buk” keşeni Ukrainağa Reseyden jetkizilgen jäne wşaqtı atıp tüsirgen soñ Reseyge qayta oralğan.

Niderlandtıñ bas prokurorı Fred Vesterbek “wşaq özge jağdayda apatqa wşırağan”, “wşaq işinde terakt bolğan” nemese “basqa wşaq şabuıl jasağan” degen boljamdardı joqqa şığarıp, bwl şeşimmen Reseydiñ keliskenin habarladı. Vesterbek reseylikterdiñ “zımıran Zaroşenskoe eldi mekeninen atıldı” degen uäjderi rastalmağının ayttı. Tekseruşiler üşin zımırandı separatisterdiñ özderi atqanı nemese olarğa Resey äskeri kömekteskeni äzirge anıq emes. Tekseru isine wşaqtı atıp tüsiruge qatısı boluı mümkin degen küdikke ilingen jüz şaqtı adam tartılğan.

Komissiya baspasöz mälihatında bwltartpas ayğaqtıñ biri retinde 2014 jılğı şildeniñ 16-17 künderi separatisterdiñ reseylik “Buk” qondırğısı turalı telefon arqılı aytqan äñgime üzindisin keltirdi.

Halıqaralıq komissiya müşeleriniñ MH17 wşağınıñ qaldığın tekserup twrğan säti. Şığıs Ukraina, tamız 2014 jıl

Halıqaralıq tekseru komissiyası qorıtındısın Gaaga halıqaralıq sotına tapsırmaq. Sonıñ negizinde wşaqtı atıp tüsiru boyınşa qılmıstıq is qozğaluı mümkin. Tekseru tobınıñ qwramına BWW qauipsizdik komitetiniñ qararına säykes Niderland, Avstraliya, Malayziya, Bel'giya jäne Ukraina elderiniñ ökilderi kirgen.

Düysenbi küni Resey qorğanıs ministrligi zımıran wşuın anıqtaytın radarlarğa tüsken mälimet qorın jariyalap, “raketanıñ separatister aymağınan atılmağanın” habarlağan bolatın. Särsenbide Resey prezidentiniñ baspasöz hatşısı Dmitriy Peskov qorğanıs ministrliginiñ mälimdemesin qoldap, “ayğaqtar kümän tudırmaydı” dedi. Al Resey sırtqı ister ministrliginiñ resmi ökili Mariya Zaharova MH17 ​wşağın atıp tüsiruge qatıstı tekseru tobınıñ twjırımı özgermegenine qınjılıs tanıtıp, Niderland prokuraturası tergeudi “bir jaqtı”, “sayasi reñkpen qarağanın” habarladı.

Malaysia Airlines kompaniyasınıñ Boeing 777 wşağı 2014 jılı şildeniñ 17-si küni Amsterdamnan Kuala-Lumpurğa MH17 reysin orındau üşin wşıp şıqqan. Wşaq Ukrainanıñ oñtüstik-şığısında qaqtığıstar jürip jatqan Doneck oblısınıñ üstinde atıp tüsirilgen.

Wşaqtağı 298 adam tügel qaza taptı. Olardıñ köbi – Niderland azamattarı. Bwl jağday aviaciya tarihındağı eñ iri 10 qaralı oqiğanıñ birine aynaldı.

Azat Europa / Azattıq radiosı