QAZAQQA TIİSKEN ADAMNIÑ TÜSİNE QASQIR KİREDİ
Saqarada erkin jortqan kök böri betpaq dalamızdı tastap ketti.
Sındıq!
Qazaqı intelligenciya – sağı sınğan intelligenciya.
Jaltaq ziyalı qauım kisi betine tura qaraudı üyrene almaptı.
Ünsizdik te – ayqın poziciya.
Dep jazdıq. Kezinde, 1997-1998 jıldarı.
Qara orman halıq bärin körip otır, dep jalğastır-dıq oyımızdı. Halıqqa üydegi sözdiñ keregi şamalı. Ne ayt, ne ündeme! Minbege şıqtıñ ba, turalğanşa ayt, tura ayta almaysın ba, minbege şıqpa.
Qasiettiñ qasiret şegip, tauqımet tartqanda ğana keletinin meñzedik.
Jalpı, bügingi ziyalı qauımdı halıq atınan söyleu hwqınan ayıru qajet, ziyalı qauım – äkim-qaranıñ suın tasıp, otının jaradı, dep te qattı ayttıq.
Kül şığarıp, ot jağadı, dedik.
Biraq, ziyalı qauım, jalpı, ömirde kezdese me, joq pa, adam tüsiniginde bar ma, joq pa, oylanbadıq.
Qazir intelligenciya degen söz keşegiden qalğan, Keñes Odağı ideologiyasınan tuğan wğım-tüsinik tärizdi körinedi.
Intellektualdar bar. Qasqırday jalğız jortqan oyşıldar bar.
Dey twrğanmen… qazaqtıñ boyındağı qasqır ölgen. Ruhımızdıñ bastauındağı böri oqqa wşqan. Kimniñ qasqırı tiri? Bizge qasqır qajet. Qaydasıñ, qasqır babalar? Serik Aqswñqarwlı. Ämirhan Balqıbek, qaydasıñ qasqır qwday bolğan kez, der edi.
Mümkin, türte bersek, türtpektesek, halıqtıñ boyındağı qasqır qayta tiriletin şığar. Qasqır tirilse, onıñ ne Mahambet, ne Sızdıq töre, ne Mağjan, ne Swltanmahmwt, ne Bauırjan, ne Mwqağali, ne Jwmatay, ne Qayrat beynesinde keletinin bilemin. Sol kezde qır astınan ana qasqırdıñ qattı wlığan dauısı şığadı.
Dabısı qır dalanı dürliktiredi.
Qır astınan qasqırdı kütiñder, jas wrpaq, ruhtıñ belgisi sol! Kökserek qayta aynalıp soğadı.. Özderiñdi qaydam, men äyteuir osığan qattı senemin. Kökserek! Kökserek!
Pikir qaldıru