ترامپ كيسسيندجەردىڭ قىتاي، رەسەي جانە يرانعا قاتىستى كەڭەسىن تىڭدادى
kerey.kz
گەنري كيسسيندجەر، اقش-تىڭ بۇرىنعى مەملەكەتتىك حاتشىسى.
اقش-تىڭ جاڭا سايلانعان پرەزيدەنتى دونالد ترامپ قىتاي، رەسەي، يران جانە ەۋروپاعا قاتىستى ماسەلەلەر بويىنشا بۇرىنعى مەملەكەتتىك حاتشى گەنري كيسسيندجەردەن كەڭەس سۇرادى. بۇل تۋرالى 17 قاراشادا ترامپتىڭ كەڭسەسى حابارلادى.
بۇرىنعى پرەزيدەنتتەر ريچارد نيكسون مەن دجەرالد فوردتىڭ تۇسىندا مەملەكەتتىك حاتشى بولعان 93 جاستاعى گەنري كيسسيندجەر “قىتايعا ەسىك اشقان”، پەكيننىڭ ونداعان جىل بويى وقشاۋلانۋدان سوڭ حالىقارالىق ارەناعا ورالۋىنا مۇمكىندىك جاساعان ساياساتكەر رەتىندە تانىمال.
كيسسيندجەر ترامپپەن سويلەسۋگە دايىن بولعان. دەگەنمەن، ول سايلاۋدا ترامپتىڭ قارسىلاسى حيللاري كلينتوندى قولداعانىن جاسىرمايدى. كيسسيندجەر سايلاۋدا كلينتون جەڭەدى دەپ كۇتكەنىن ايتتى.
The Atlantic جۋرنالىندا وسى ايدا جاريالانعان سۇحباتىندا كيسسيندجەر 2016 جىلعى سايلاۋدا پرەزيدەنتتىككە كانديداتتاردىڭ اراسىنان حيللاري كلينتوننىڭ عانا اقش-تىڭ حالىقارالىق ساياساتقا باعىتتالعان ءداستۇرلى مودەلىن ۇستانعانىن ايتتى. كيسسيندجەر اقش-تىڭ ناتو سياقتى اليانستارعا مۇشە بولۋىنىڭ قانشالىقتى زاڭدىلىعى تۋرالى ماسەلەنى بىرنەشە رەت كوتەرگەن ترامپتىڭ جەڭىسى “ەكىنشى دۇنيەجۇزىلىك سوعىس اياقتالعاننان بەرى ءبىرىنشى رەت اقش-تىڭ الەممەن قارىم-قاتىناسى قالاي بولاتىنى ايقىندالماي تۇرعانىن بىلدىرەتىنىن” ايتتى. كيسسيندجەردىڭ كەيبىر ماسەلەلەرگە قاتىستى الاڭداۋشىلىعىنا قاراماستان ترامپ كەڭسەسى جاڭا پرەزيدەنت پەن بۇرىنعى مەملەكەتتىك حاتشىنىڭ “اۋقىمدى كەزدەسۋ وتكىزگەنىن” حابارلادى.
“مەن دوكتور كيسسيندجەردى سىيلايمىن جانە ءوز ويلارىمەن بولىسكەنى ءۇشىن باعالايمىن” دەدى كيسسيندجەر. ترامپ كيسسيندجەرمەن قىتاي، رەسەي، يران، ەۋروپا جانە باسقا دا حالىقارالىق ماسەلەلەردى تالقىلاعانىن عانا ايتىپ، كەزدەسۋ جايلى ەگجەي-تەگجەيلى باياندامادى.
ازات ەۋروپا / ازاتتىق راديوسى
پىكىر قالدىرۋ