ستامبۋل اۋەجايىنداعى جارىلىستاردان ونداعان ادام ءولدى
ستامبۋلداعى جارىلىستاردان كەم دەگەندە 36 ادام قازا تاۋىپ، 140 كىسى جارالاندى. جارىلىستار حالىقارالىق اتاتۇرىك اۋەجايىندا ماۋسىمنىڭ 28-ءى كۇنى كەشكە بولدى.
تۇركيا بيلىگى ء“ۇش جانكەشتىنىڭ اۋەجايعا تاكسيمەن كەلىپ، پوليتسيامەن اتىسقانىن، مۇنان سوڭ جولاۋشىلاردى تىركەۋ ايماعىندا جارىلىستار جاساعانىن” مالىمدەدى. شابۋىل جاساعانداردىڭ ءبىرى اۋەجايداعى جۇرتقا وق جاۋدىرعان.
تۇركيانىڭ ادىلەت ءمينيسترى بەكير بوزداگ اۋەجايعا جاقىن جەردەگى مەترو بەكەتىندە دە جارىلىس بولعانى تۋرالى اقپارات تاراعانىن حابارلادى. تۇرىك پرەمەر-ءمينيسترى بينالي يىلدىرىم جارىلىستاردىڭ ارتىندا “يسلام مەملەكەتى” (يم – قازاقستاندا تىيىم سالىنعان) ەكسترەميستىك ۇيىمى تۇر دەۋگە نەگىز بار ەكەنىن مالىمدەدى. تۇركيا پرەزيدەنتى رەجەپ تايىپ ەردوعان جارىلىستاردى جاساعان سودىرلاردى ايىپتاپ، “كىناسى جوق بەيبىت تۇرعىندار” قازا تاپقانىن ايتتى. ول مۇنداي جارىلىستار باسقا ەلدەردىڭ دە اۋەجايلارىندا قايتالانۋى مۇمكىن ەكەنىن ەسكەرتىپ، ء“بىز بارلىق ەلدەردى، اسىرەسە، باتىس مەملەكەتتەرىن تەرروريزمگە قارسى قاتاڭ كۇرەسۋگە شاقىرامىز” دەپ مالىمدەدى. .
كۋاگەرلەردىڭ ايتۋىنشا، ءۇش جويقىن جارىلىس بولعان كەزدە اۋەجاي عيماراتىنىڭ توبەسى وپىرىلىپ، جۇرت ۇرەيدەن جان-جاققا قاشقان. كەم دەگەندە 147 ادام اۋرۋحاناعا ءتۇستى. ولاردىڭ اراسىندا پوليتسيا قىزمەتكەرلەرى دە بار.
جارىلىستاردان سوڭ اۋەجايدان ۇشقالى تۇرعان بارلىق رەيستەر شەگەرىلگەن. ۇشىپ كەلەتىن جولاۋشىلاردى جاقىن ماڭداعى باسقا اۋەجايلار قابىلداعان. ماۋسىمنىڭ 29-ى كۇنى اتاتۇرىك اۋەجايىنىڭ جۇمىسى قايتا جالعاسقانى حابارلاندى.
ال الماتى اۋەجايىندا بۇگىن Turkish Airlines كومپانياسىنىڭ تاڭەرتەڭگى ساعات 6:45-تە ستامبۋلعا ۇشۋى ءتيىس رەيسى بوگەلىپ، ساعات 10-دا ۇشۋى ءتيىس تاعى ءبىر رەيسى شەگەرىلگەن. سونىمەن قاتار وسى كومپانيانىڭ تاڭەرتەڭ ستامبۋلدان ۇشىپ كەلۋى ءتيىس رەيسى دە توقتاتىلعان.
الەم ەلدەرى جانە قازاقستان رەاكتسياسى
اقش، بۇۇ، گەرمانيا جانە باسقا ەلدەر ستامبۋل اۋەجايىنا جاسالعان شابۋىلدى قاتاڭ ايىپتادى.
اق ءۇي (اقش) وكىلى دجوش ەرنەست «حالىقارالىق اتاتۇرىك اۋەجايى – بيىل شابۋىلعا ۇشىراعان بريۋسسەل اەروپورتى سياقتى حالىقارالىق بايلانىستاردىڭ سيمۆولى. ولار ءبىزدى بىرىكتىرەدى. ءبىز ناتو-داعى وداقتاسىمىز ءارى ارىپتەسىمىز تۇركيانى قولدايمىز» دەدى.
قازاقستاننىڭ سىرتقى ىستەر مينيسترلىگى ء(سىم) “ازىرگى اقپاراتتار بويىنشا، ستامبۋل اۋەجايىندا جارالانعاندار مەن قازا تاپقان ادامدار اراسىندا قازاقستان ازاماتتارى جوق” دەپ حابارلادى. ءسىم ءباسپاسوز حاتشىسى ءانۋار جايناقوۆ “قازىرگى دەرەكتەرگە قاراعاندا، جارالانعاندار مەن قازا تاپقاندار اراسىندا قازاقستان ازاماتتارى جوق. بۇل العاش جەتكەن اقپارات. بۇل جايتتى انىقتاۋدى جالعاستىرا بەرەمىز” دەدى.
ءسىم-ءنىڭ رەسمي مالىمدەمەسىندە “تۇركيا ۇكىمەتىنە جانە باۋىرلاس حالىققا، وسى زۇلىمدىق ارەكەت قۇرباندارىنىڭ تۋىستارى مەن جاقىندارىنا قايعىرىپ كوڭىل ايتامىز. قازاقستان تەرروريزمنىڭ كەز كەلگەن كورىنىسىنە قارسى ىمىراسىز كۇرەستى ءوزىنىڭ تولىق قولدايتىنىن راستاي وتىرىپ، تەرروريزمگە قارسى كەڭ اۋقىمدى حالىقارالىق كواليتسيا قۇرۋ ارقىلى وسى باعىتتاعى حالىقارالىق ارەكەتتەردى ۇيلەستىرۋدى بارىنشا نىعايتۋعا شاقىرادى” دەپ جازىلعان.
قازاقستان پرەمەر-ءمينيسترى كارىم ءماسىموۆ تۇركيا رەمەر-ءمينيسترى بينالي يىلدىرىمعا ستامبۋلداعى تەراكتىگە بايلانىستى كوڭىل ايتۋ جەدەلحاتىن جولدادى. تۇرىك حالقىنا قازاقستان سەناتى سپيكەرى قاسىم-جومارت توقاەۆ Twitter ارقىلى كوڭىل ايتتى.
كەيىنگى ايلار ىشىندە تۇركيادا بىرنەشە جارىلىس بولدى. ول جارىلىستاردى تۇرىك بيلىگى يم سودىرلارى مەن كۇرد كوتەرىلىسشىلەرىنەن كورەدى.
ازاتتىق راديوسى
پىكىر قالدىرۋ