Türkiya biligi “üş jankeştiniñ äuejayğa taksimen kelip, policiyamen atısqanın, mwnan soñ jolauşılardı tirkeu aymağında jarılıstar jasağanın” mälimdedi. Şabuıl jasağandardıñ biri äuejaydağı jwrtqa oq jaudırğan.

Türkiyanıñ ädilet ministri Bekir Bozdag äuejayğa jaqın jerdegi metro beketinde de jarılıs bolğanı turalı aqparat tarağanın habarladı. Türik prem'er-ministri Binali Yıldırım jarılıstardıñ artında “Islam memleketi” (IM – Qazaqstanda tıyım salınğan) ekstremistik wyımı twr deuge negiz bar ekenin mälimdedi. Türkiya prezidenti Rejep Tayıp Erdoğan jarılıstardı jasağan sodırlardı ayıptap, “kinäsi joq beybit twrğındar” qaza tapqanın ayttı. Ol mwnday jarılıstar basqa elderdiñ de äuejaylarında qaytalanuı mümkin ekenin eskertip, “Biz barlıq elderdi, äsirese, Batıs memleketterin terrorizmge qarsı qatañ küresuge şaqıramız” dep mälimdedi. .

Kuägerlerdiñ aytuınşa, üş joyqın jarılıs bolğan kezde äuejay ğimaratınıñ töbesi opırılıp, jwrt üreyden jan-jaqqa qaşqan. Kem degende 147 adam auruhanağa tüsti. Olardıñ arasında policiya qızmetkerleri de bar.

Jarılıstardan soñ äuejaydan wşqalı twrğan barlıq reyster şegerilgen. Wşıp keletin jolauşılardı jaqın mañdağı basqa äuejaylar qabıldağan. Mausımnıñ 29-ı küni Atatürik äuejayınıñ jwmısı qayta jalğasqanı habarlandı.

Al Almatı äuejayında bügin Turkish Airlines kompaniyasınıñ tañerteñgi sağat 6:45-te Stambulğa wşuı tiis reysi bögelip, sağat 10-da wşuı tiis tağı bir reysi şegerilgen. Sonımen qatar osı kompaniyanıñ tañerteñ Stambuldan wşıp kelui tiis reysi de toqtatılğan.

ÄLEM ELDERİ JÄNE QAZAQSTAN REAKCIYASI

AQŞ, BWW, Germaniya jäne basqa elder Stambul äuejayına jasalğan şabuıldı qatañ ayıptadı.

Aq üy (AQŞ) ökili Djoş Ernest «Halıqaralıq Atatürik äuejayı – biıl şabuılğa wşırağan Bryussel' aeroportı siyaqtı halıqaralıq baylanıstardıñ simvolı. Olar bizdi biriktiredi. Biz NATO-dağı odaqtasımız äri äriptesimiz Türkiyanı qoldaymız» dedi.

Mediki i spasateli v stambul'skom aeroportu posle vzrıvov. 28 iyunya 2016 goda.

Qazaqstannıñ sırtqı ister ministrligi (SİM) “äzirgi aqparattar boyınşa, Stambul äuejayında jaralanğandar men qaza tapqan adamdar arasında Qazaqstan azamattarı joq” dep habarladı. SİM baspasöz hatşısı Änuar Jaynaqov “Qazirgi derekterge qarağanda, jaralanğandar men qaza tapqandar arasında Qazaqstan azamattarı joq. Bwl alğaş jetken aqparat. Bwl jayttı anıqtaudı jalğastıra beremiz” dedi.

SİM-niñ resmi mälimdemesinde “Türkiya ükimetine jäne bauırlas halıqqa, osı zwlımdıq äreket qwrbandarınıñ tuıstarı men jaqındarına qayğırıp köñil aytamız. Qazaqstan terrorizmniñ kez kelgen körinisine qarsı ımırasız küresti öziniñ tolıq qoldaytının rastay otırıp, terrorizmge qarsı keñ auqımdı halıqaralıq koaliciya qwru arqılı osı bağıttağı halıqaralıq äreketterdi üylestirudi barınşa nığaytuğa şaqıradı” dep jazılğan.

Qazaqstan prem'er-ministri Kärim Mäsimov Türkiya rem'er-ministri Binali Yıldırımğa Stambuldağı teraktige baylanıstı köñil aytu jedelhatın joldadı. Türik halqına Qazaqstan senatı spikeri Qasım-Jomart Toqaev Twitter arqılı köñil ayttı.

Keyingi aylar işinde Türkiyada birneşe jarılıs boldı. Ol jarılıstardı türik biligi IM sodırları men kürd köterilisşilerinen köredi.

Azattıq radiosı