«ماڭگىلىك ەل» يدەياسىن بايىتادى
بيىل ءوڭىردىڭ وزگەشە ءھام تەرەڭ تاريحىنا ۇڭىلگەن جىل بولدى. العاش رەت شىعىس قازاقستان وبلىسىنىڭ 2016-2018 جىلدارعا ارنالعان ارحەولوگيالىق عىلىمي-زەرتتەۋ جۇمىستارىن جۇرگىزۋدى دامىتۋ جوسپارى جۇزەگە اسىرىلا باستادى. باعدارلاماعا سايكەس، كاتونقاراعايداعى بەرەل قورعاندارىندا، زايسانداعى شىلىكتى وبالارىندا، ۇلان اۋدانىنداعى ابلايكيت قامال-عيباداتحاناسىندا، اباي اۋدانىنداعى قىرىقۇڭگىر ەسكەرتكىشىندە، تارباعاتايداعى ەلەكە سازىندا قازبا جۇمىستارى جۇرگىزىلدى. اتالعان زەرتتەۋ جۇمىستارىنىڭ ناتيجەسى وسكەمەندە وتكەن «التاي – تۇركى الەمىنىڭ التىن بەسىگى» حالىقارالىق عىلىمي-ءتاجىريبەلىك كونفەرەنتسياسى اياسىندا قورىتىندىلاندى. القالى باسقوسۋعا فرانتسيا، وڭتۇستىك كورەيا، رەسەي جانە موڭعوليا مەملەكەتتەرى ەلشىلىكتەرىنىڭ ديپلوماتتارى، قازاقستان، تۇركيا، رەسەي، ۇلىبريتانيا، ۆەنگريا، گەرمانيا، پولشا، قىتاي ەلدەرىنىڭ ۇزدىك ارحەولوگتارى مەن تۇركىتانۋشىلارى قاتىستى. شارا الدىندا كونفەرەنتسياعا قاتىسۋشىلار مەن ءوڭىر تۇرعىندارى ءۇش كيىز ۇيگە قويىلعان قازبا جۇمىستارى كەزىندە تابىلعان بىرەگەي بۇيىمداردى تاماشالادى. ەڭ باستى جادىگەرلەر – «التىن ادام» مەن بەرەل جازىعىنداعى №11 قورعاننان تابىلعان جىلقىنىڭ كوشىرمەلەرى مادەنيەت سارايىنىڭ دالىزىندە جيىنعا قاتىسۋشىلاردى قارسى الدى. پلەنارلىق وتىرىس بارىسىندا عالىمدار ارحەولوگيا عىلىمىنىڭ جانە شىعىس قازاقستاندا تابىلعان تاريحي جادىگەرلەردى ساقتاۋ مەن ونى مۇراجايعا قويۋدىڭ وزەكتى ماسەلەلەرىن تالقىلادى. ارحەولوگتاردىڭ پىكىرىنشە، بۇل – ءوڭىردىڭ مادەني جانە ەكونوميكالىق دامۋىنا، تۋريستىك ينفراقۇرىلىمىنىڭ قالىپتاسۋىنا جاعىمدى اسەر ەتەدى.
جيىندى اشقان ءوڭىر باسشىسى دانيال احمەتوۆ ەلىمىزدىڭ جاڭا مادەني ساياساتىنىڭ باستى ستراتەگياسى – ەلباسى نۇرسۇلتان نازارباەۆتىڭ «ماڭگىلىك ەل» يدەياسى ەكەنىن اتاپ ءوتىپ، التىن بەسىك – التايدىڭ ادامزات مادەنيەتىنىڭ كونە وشاقتارىنىڭ ءبىرى ەكەنىنە توقتالدى.
– عىلىمي-زەرتتەۋ جۇمىستارىن ءوڭىرىمىزدە جۇرگىزۋ قاجەتتىلىگى كۇمان تۋدىرمايدى. مۇنداي جۇمىستار زەرتتەلگەن نىسانداردى يۋنەسكو-نىڭ الەمدىك مۇرالارىنىڭ قاتارىنا قوسۋ ءۇشىن قاجەتتى تەوريالىق نەگىزى مەن ءوڭىرىمىزدىڭ مادەني برەندىن قالىپتاستىرىپ، تۋريستىك الەۋەتىنىڭ ارتۋىنا سەپ بولماق. قازبا جۇمىستارىنىڭ ناتيجەسىندە تابىلعان جادىگەرلەر وبلىسىمىزدا قالىپ، جاستارىمىزدىڭ پاتريوتتىق ءتاربيەسى ءۇشىن قىزمەت ەتەتىن بولادى، – دەدى د.احمەتوۆ. ايماق باسشىسى قازبا جۇمىستارى كەزىندە تابىلعان زاتتاردىڭ وبلىستىق تاريحي-ولكەتانۋ مۇراجايىنا بەرىلەتىنىن ايتتى. وسى كونفەرەنتسيادان ءبىر كۇن بۇرىن كاتونقاراعاي اۋدانىنىڭ بەرەل قورعاندارىندا ەلىمىزدە بالاماسى جوق اسپان استىنداعى مۇراجاي اشىلعانىن اتاپ ءوتۋ كەرەك. مۇنداي مۇراجاي كەلەسى جىلى شىلىكتى جازىعىندا دا سالىنباق.
– بيىلعى قازاقستاندىق ارحەولوگيانىڭ ۇلكەن جەتىستىگى – بەرەلدەگى №2 قورعاننىڭ ۇستىنە اشىق اسپان استىنداعى مۋزەيدىڭ سالىنۋى دەر ەدىك. ءوڭىر باسشىسى دانيال احمەتوۆتىڭ قورعانمەن تانىسقان ساتتە بىردەن شەشىم قابىلداعانىنا ريزا بولدىق. وبلىس اكىمى ۋادەسىن ورىندادى. بۇل – ارحەولوگيا عىلىمىنا زور قولداۋ دەپ بىلەمىز. ويتكەنى، ءبىر ايدىڭ ىشىندە جەدەل ارحەولوگيالىق مۋزەي سالۋ ەكىنىڭ ءبىرىنىڭ قولىنان كەلە بەرمەيدى. ءوڭىر مادەنيەتى ءۇشىن ەرەكشە وقيعا بولعان اسپاناستى مۇراجايىنىڭ كەلەر ۇرپاقتى ەلجاندىلىققا تاربيەلەۋدەگى ماڭىزى زور، – دەيدى بەرەل قورعاندارىنا 20 جىلدان بەرى زەرتتەۋ جۇرگىزىپ كەلە جاتقان بەلگىلى ارحەولوگ زەينوللا ساماشەۆ.
بەرەل بەدەرلەرى
ەندى بيىلعى جىلدىڭ عىلىمي ولجاسىنا اينالعان ارحەولوگيالىق قازبا جۇمىستارىنىڭ تابىسى جونىندە از-كەم ءسوز. كونفەرەنتسيادا العاشقىلاردىڭ ءبىرى بولىپ ءسوز العان زەينوللا ساماشەۆ التايداعى ارحەولوگيالىق قازبالاردى ەكى توپقا ءبولىپ قاراۋعا بولاتىنىن ايتتى. ءبىرىنشىسى، ەرتە تەمىر داۋىرىندەگى ساقتار كەزەڭى. وسى كەزەڭگە تيەسىلى №2 جانە №19 قورعانعا بيىل قازبا جۇمىستارى جۇرگىزىلدى. №2 قورعاننان ەگدە جاستاعى ايەل مۇردەسى مەن جەتى جىلقى تابىلدى. پاتشا اۋلەتىنەن شىققاندىقتان مارتەبەسىنە بايلانىستى اداممەن بىرگە جەتى جىلقىنى قويعان. بىراق قورعانداعى التىن بۇيىمدار تونالعان، كوپ زاتتار تابىلمادى. پاتشايىمنىڭ التىنمەن ادىپتەلگەن كيىمىنىڭ كەيبىر جۇرناقتارى عانا ساقتالىپتى. جۇزدەگەن اشەكەيدەن تۇراتىن التىن كيىمىنىڭ، وكىنىشكە قاراي، كەيبىر بولىگى عانا قالعان. سونداي-اق، قولادان قۇيىلعان اينا تابىلدى. ونىڭ سابى جىرتقىش اڭنىڭ بەينەسىندە جاسالعان. قاسىنا كەندىر ءدانىن ۇنتاقتايتىن ارنايى قۇرال مەن ىدىس قويىلعان. پاتشايىم كوپ اۋىرعان قارتاڭ ادامعا ۇقسايدى. ويتكەنى، قورعاننان تابىلعان ادامنىڭ تىستەرى سيرەپ، ومىرتقا سۇيەگى ءبىر-بىرىنە جابىسىپ قالعان. بۇكىر ادام بولۋى دا مۇمكىن. الگى قۇرالداردى ەمگە پايدالانعان سياقتى. وسىعان ۇقساس قۇرال بۇرىن قازىلعان قورعانداردىڭ بىرىنەن تابىلعان ەدى. قولا قۇتىنىڭ ەكى جاعىندا تەسىگى مەن تۇتىگى بار. ىشىندە التى-جەتى مالتا تاس جاتتى. ياعني كەندىردىڭ ءدانىن وسى ىدىسقا سالىپ، تاستى قىزدىرىپ قۇتىداعى سۋعا تاستاپ جىبەرەدى. وسىلايشا، بۋىرقانىپ ەكى ءتۇتىگىنەن شىققان بۋمەن ەمدەلگەن بولۋى كادىك. قاتتى اۋىرعان جان بولعاندىقتان و دۇنيەگە بارعاندا ەم-دومىنا قاجەت بولادى دەگەن ويمەن جانىنا قويعان. سونداي-اق، بىرنەشە جىلقىنىڭ باسىنا اشەكەيلى بەتپەردە كيگىزىلگەن. ءبىر اتتىڭ باسىندا التىننان قۇيعان قۇستىڭ بەينەلەرى شىقتى. بۇعان دەيىن №10 قورعاندا تابىلعان اتتىڭ ەر-تۇرمانىنىڭ اشەكەيلەرىندە بىرنەشە قوراز بەينەلەرى بەدەرلەنگەن بولاتىن. №19 قورعان دا قاتتى تونالعان. بىراق توناۋشىلار قابىردەگى مۇردەنى اياعىنان ءسۇيرەپ تارتقان كەزدە باس كيىمىنىڭ ءبىر بولىگى ورنىندا قالىپ قالعان ەكەن. ياعني ەسىك قورعانىنداعى «التىن ادامنىڭ» باس كيىمىنە ۇقساس التىننان جاسالعان ساۋكەلە قالدىقتارى تابىلدى. وتە قىزىق ءارى قۇندى دۇنيە. بۇل – ەندى بوي جەتە باستاعان جاس قىزدىڭ مۇردەسى.
عالىمنىڭ ايتۋىنشا، ەكىنشى توپقا تيەسىلى قورعانداردا زاتتار از تابىلعانىمەن، ونىڭ عىلىمي تۇيىندەردى تارقاتۋداعى ماڭىزى زور. بۇل جەرلەۋ ورىندارىنىڭ ساۋلەتتىك قۇرىلىمى ەرەكشە بولىپ كەلەدى. ماسەلەن، تاستان قالانعان دوڭگەلەك شەڭبەردىڭ ىشىنە ادام مەن اتتاردى جاشىكپەن دە، جاشىكسىز دە جەرلەگەن. وسى وبالاردان عۇندار مەن كونە تۇركى زامانى اراسىنداعى بوس كەڭىستىكتى تولتىرۋعا قاجەتتى قۇندى ماتەريالدار تابىلدى. بۇل شارتتى تۇردە ءسانبي-جۋجان كەزەڭى اتالادى. ءتۇركىلەردى ورحوننان التايعا كوشىرگەن ءسانبيلەر. تۇركىلەر تەمىر بالقىتىپ، ودان ءتۇرلى قۇرال-جاراقتار قۇياتىن. كەيىن كوبەيىپ، سانى وسكەن تۇركىلەر 555 جىلى قوجايىندارىن تالقانداپ، جەكە مەملەكەتىن – العاشقى تۇرىك قاعاناتىن قۇردى. مىنە، ەكىنشى توپقا جاتاتىن قورعانداردان ءىى-IV عاسىرلار ارالىعىنداعى وسى ءسانبي-جۋجاندارعا تيەسىلى مادەنيەت جۇرناقتارى تابىلدى. ولار حۋننۋلاردى تالقانداۋ ارقىلى تاريح ساحناسىنا كوتەرىلگەن، جەرگىلىكتى جۇرتپەن ارالاسىپ، ەرەكشە مادەنيەت جاساعان حالىق. سانبيلەردى پروتوتۇركىلەر، تۇركىتەكتەس حالىق دەپ اتاۋعا بولادى، دەدى ز.ساماشەۆ.
شىلىكتى شەجىرەسى
شىلىكتى جازىعىنداعى ساق وبالارىن قازۋعا جەتەكشىلىك جاساعان ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى ابدەش تولەۋباەۆتىڭ ايتۋىنشا، شىلىكتى دالاسى – شىعىس ءوڭىرىندەگى ساق ەسكەرتكىشتەرىنىڭ ەڭ كونە ەليتارلىق ەسكەرتكىشتەرى ورنالاسقان جەر. بۇل ەسكەرتكىشتەردى 1949-1970 جىلدار ارالىعىندا كەڭەستىك ارحەولوگ س.س.چەرنيكوۆ زەرتتەدى. تاۋەلسىزدىك العاننان كەيىن شىلىكتى وبالارىن زەرتتەۋدى 2003 جىلدان باستاپ «مادەني مۇرا» جوباسى شەڭبەرىندە قازاقستاندىق عالىمدار قولعا الدى. 2012 جىلى مەملەكەتتىك تاپسىرىس توقتاپ قالعاندىقتان، ءتورت جىلدىق ۇزىلىستەن كەيىن شىلىكتىدەگى زەرتتەۋ جۇمىستارى ارحەولوگيانى دامىتۋدىڭ وڭىرلىك باعدارلاماسى ارقىلى قايتا جالعاستى. ءا.تولەۋباەۆ مۇندا ەرتە تەمىر ءداۋىرىنە جاتاتىن 200-گە جۋىق ساق وبالارى بار ەكەنىن ايتتى. ونىڭ ىشىندە 50-گە تارتا ەليتارلىق نەمەسە پاتشا وبالارى بار.
ەۋرازيا دالاسىندا ءدال شىلىكتى جازىعىنداعىداي ەليتارلىق وبالار تىعىز توپتاسقان ايماق وتە سيرەك كەزدەسەدى. ءبىزدىڭ ماقساتىمىز – وسى وبالاردى زەرتتەۋ. بيىل №16 وبانى قازدىق. وبانىڭ بيىكتىگى – 8,6, ديامەترى – 88 مەتر. قازاقستاندا وسى ىسپەتتى بيىك، وراسان ءىرى وبا سيرەك. قازۋ بارىسىندا توپىراق وبانىڭ استىنان تاس وبا شىقتى. شىلىكتىدەگى بۇرىن قازعان وبالاردىڭ دا سىرتى توپىراق بولعانىمەن، استىنان تاس وبا شىعاتىن. تاس وبا استىندا اعاش قابىرحانا ورنالاسادى. بۇل ساۋلەتتىك جاعىنان وتە ەرەكشە قۇرىلىمعا يە قورعان. مەن وسى ورايدا تاريحي ساۋلەت جوبالارىن زەرتتەۋمەن شۇعىلداناتىن بەلگىلى عالىمداردى شاقىرعانىمدى ايتايىن. ولار وبا قۇرىلىسىنىڭ كۇردەلى ءارى ءجىتى ەسەپكە قۇرىلعان قۇرىلىمىنا تاڭعالعاندارىن جاسىرمادى. وبلىس اكىمى دانيال احمەتوۆ وسى وبانىڭ ساۋلەتتىك ەرەكشەلىگىمەن جانە جادىگەرلەرىمەن تانىسا كەلە، ونى ساقتاپ قالۋ ءۇشىن اسپان استى مۋزەيىن سالۋعا ۋادە بەرىپ وتىر. ەگەر ءبىز ءبىر جىل اياسىندا وبانى جاپپاساق، الداعى ۋاقىتتا ونىڭ عاسىرلار بويى ساقتالعان بەت-بەينەسى بۇزىلاتىن بولادى، دەدى ءا.تولەۋباەۆ.
عالىم وبانىڭ ورتاڭعى بولىگىندە تاس ءۇيىندىنىڭ جوقتىعى – وبانىڭ تونالعاندىعىن كورسەتەتىن بىردەن-ءبىر بەلگى ەكەندىگىن جەتكىزدى. قازۋ جۇمىستارىن جالعاستىرۋ بارىسىندا اعاش قابىرحانا شىقتى. وڭتۇستىكتەن سولتۇستىككە 6 مەتر، شىعىستان باتىسقا 4 مەتر بولاتىن قابىرحانانىڭ اعاش بورەنەلەرىنىڭ ديامەترى 60 سانتيمەتردى قۇرايدى. بورەنەلەردىڭ اراسى تاستارمەن بىتەلگەن. بۇل بۇرىن ءبىز قازعان وبالارعا دا، چەرنيكوۆ زەرتتەگەن وبالار قۇرىلىمىنا دا ۇقساس، دەدى ول. قاتتى قيراتىلىپ، تونالعانى بەلگىلى بولدى. قيراعان سوڭ سۋ ءوتىپ، اعاش ءشىرۋگە شاق قالعان. قابىردە ەكى ادام قويىلعان ەكەن. ونىڭ ءبىرى جاقسى ساقتالعان. التىن بۇيىمدار وسى قابىردەن تابىلىپتى. 2 مىڭعا جۋىق وتە ۇساق، ميكروسكوپيالىق قوڭىراۋشالار ىسپەتتى التىن مونشاقتاردى توپىراقتان ارشىپ الۋعا ءبىر اي ۋاقىت كەتتى. ودان ىرىلەۋ التىن اشەكەيلەردىڭ سانى 200-گە جۋىق. بۇل اشەكەيلەر شاشىلىپ قالعاندىقتان، ونى جەرلەۋ كەزىندەگى ۇلگىسىنە كەلتىرۋ مۇمكىن بولماعان. ال وڭ جاق قابىرحاناداعى ادام الدىڭعىداي ءسان-سالتاناتپەن جەرلەنبەگەن. ونىڭ ۇستىنە، باسى شىعىسقا قاراپ جاتىر. سونداي-اق، باس سۇيەگى بورەنەمەن جانشىلعان. بولجام بويىنشا، ول پاتشانىڭ قۇلدارىنىڭ ءبىرى بولۋى مۇمكىن نەمەسە وبانى توناۋشىلار سۇيەكتى اۋدارىپ تاستاعان. بۇل سۇيەكتىڭ ءجوندى ساقتالماۋىنىڭ سەبەبى، توبەسىنىڭ شىممەن قالانۋى دەۋگە بولادى. شىم ىلعال وتكىزەتىندىكتەن اعاشتى شىرۋگە الىپ كەلەدى. جالپى العاندا، بۇل وبادا وتە ءىرى ساق بيلەۋشىسى جەرلەنگەنى انىقتالدى.
سونىمەن بىرگە، شىلىكتى جازىعىنداعى شاعىن وبالاردىڭ ءبىرى سانالاتىن №7 قورعاندا جىلقىمەن بىرگە جەرلەنگەن ادام مۇردەلەرى تابىلدى. ءا.تولەۋباەۆتىڭ ايتۋىنشا، جىلقىمەن بىرگە جەرلەۋ ءداستۇرى شىلىكتىدە بۇرىن-سوڭدى كەزدەسپەگەن بولاتىن. وبانىڭ ۇستىڭگى بولىگىندە قولى مەن اياعى بايلانعان ايەل مۇردەسى، ودان 70 سانتيمەتردەي تومەندە ەرىنىڭ جەرلەنگەنى انىقتالدى. بۇل دا زەرتتەۋدى قاجەت ەتەتىن تىڭ جاڭالىقتىڭ ءبىرى.
اتاعى الىسقا كەتكەن ابلايكيت
بەلگىلى عالىم كارل بايپاقوۆ ورتاعاسىرلىق ابلايكيت ەسكەرتكىشىنىڭ ەرەكشەلىكتەرى ءجونىندە اڭگىمەلەدى. ول جوڭعار شاپقىنشىلىعى كەزىندە شىعىس وڭىرىندە بوي كوتەرگەن قامال-عيباداتحانانى زەرتتەۋ ءۇردىسىن ەلىمىزدەگى بۋدديستىك ءىلىمنىڭ تارالۋى اياسىندا قاراستىرۋ كەرەكتىگىن جەتكىزدى. ءبىر جارىم مىڭ جىل بۇرىن ءۇندىستاندا پايدا بولعان بۋدديستىك ءىلىم جىبەك جولى ارقىلى تارالىپ، قىتاي جانە ورتا ازيا ارقىلى قازاقستانعا دا كەلدى. ەلىمىزدىڭ ەۋروپا مەن ازيا اراسىنداعى جاعرافيالىق كوپىرلىك مىندەتى ساۋدا-ەكونوميكالىق بايلانىستارعا عانا ەمەس، دىنارالىق قارىم-قاتىناستار ءۇشىن دە ماڭىزدى ءرول اتقاردى. قازاقستاندا ورتا عاسىرلارداعى بۋدديستىك كەشەندەردىڭ بولعانىنا ءبىز جازبا دەرەكتەر ارقىلى دا، ارحەولوگيالىق قازبا جۇمىستارى ارقىلى دا قول جەتكىزىپ وتىرمىز، دەدى ك.بايپاقوۆ. VII عاسىردا باتىس تۇرىك قاعاناتىنىڭ بىرقاتار بيلەۋشىلەرى بۋدديزمگە قولداۋ كورسەتكەن. جەتىسۋ جەرىندەگى ورتاعاسىرلىق قالالاردان دا بۋدديزم بەلگىلەرى كوپتەپ تابىلعانىن، ويرات تايپالارى سالعان بۋددا لامالارىنىڭ عيبادات ورىندارى «كيت-حيت» اتالعانىن ايتقان عالىم ونىڭ كىرپىشتەن، ساباننان سالىنىپ، عيبادات ورنى بەكىنىس، شارۋاشىلىق-تۇرمىستىق جانە تۇرعىن-جاي رەتىندە پايدالانىلعانىن جەتكىزدى. مۇنداي ورىندار پاۆلودار وبلىسى مەن سەمەي قالاسى اۋماعىندا دا بولعان. ال ابلايكيت بەكىنىسىن 1654 جىلى جوعارعى ەرتىستىڭ سول جاعالاۋىندا، قالبا تاۋلارىنىڭ اراسىنا ويرات بيلەۋشىسى ابلاي ءتايجى سالدىردى. بۋددالىق عيباداتحانانىڭ قىسقاشا تاريحى وسى. ابلايكيت – XVII عاسىردىڭ 50-60 جىلدارىندا بۋددانىڭ ءىرى ورتالىقتارىنىڭ ءبىرى بولدى. كەيىننەن وسكەمەن بەكىنىسىنىڭ نەگىزىن قالاۋشى ي.م.ليحارەۆتىڭ جەتەكشىلىگىمەن كەلگەن ورىس وتريادى عيباداتحانا ورنىنان تيبەت پەن ويرات قولجازبالارىنىڭ، بۋددا يكوندارى مەن قولا مۇسىندەرىنىڭ مول قورىن جانە تيبەت-موڭعول قولدانبالى-ءساندىك ونەر بۇيىمدارىن تاۋىپ، رەسەيگە الىپ كەتەدى. بۇل ەۋروپالىق تيبەتتانۋ عىلىمىنىڭ نەگىزىن قالاعان قۇندى دۇنيەلەر بولاتىن. جالپى، ابلايكيت تۋرالى كوپتەگەن ساياحاتشى-عالىمدار جازبا دەرەكتەر قالدىرعان. ونىڭ ءىشىندە قازاق دالاسىن ازياعا اشىلاتىن قاقپا ساناعان ءى پەتر دە وسى كەزەڭدە قازاقستان مەن ورتا ازيانى تانىپ-بىلۋگە كۇش سالعان. كەشەننىڭ ساقتالىپ قالعان جوباسىنان ونىڭ سول كەزدەگى ەڭ ادەمى عيباداتحانالاردىڭ ءبىرى بولعانىن كورۋگە بولادى. بۇل كەشەن قورعانىس ماقساتىن كوزدەگەندىكتەن سىرتقى دۋالىنىڭ بارلىعى تاستان قالانعان. ونىڭ ءبىرشاما بولىگى بۇگىنگە دەيىن ساقتالعان. بۋددا ءىلىمىن تاراتۋشى زايا-پانديتانىڭ ىقپالىمەن سالىنعان ابلايكيت عيباداتحاناسى اۋماعىندا بيىل مامىر ايىنان بەرى وبلىس اكىمىنىڭ باستاماسىمەن ارحەولوگيالىق قازبا جۇمىستارى جۇرگىزىلدى. بەكىنىس قابىرعاسى مەن كەشەننىڭ كىرەبەرىسىنە جۇرگىزىلگەن قازبا جۇمىستارى ناتيجەسىندە وڭتۇستىك بولىگىندەگى جالپى اۋماعى 520 شارشى مەتر بولاتىن جەر ارشىلدى. بۇل كەشەننىڭ قورعانىسقا ارنالعان قۇرىلىمىنىڭ جالپى ۇزىندىعى – 2125 مەتر. عيباداتحانا استىندا وڭتۇستىك جانە شىعىس جاعىنداعى تۇرعىنجاي مەن شارۋاشىلىققا پايدالانعان الاڭدار تاس قابىرعامەن بولىنگەن. قابىرعادان 50 مەتر جەردە ارىق وتەدى. وسىلايشا، قامالدىڭ قورعانىس قابىلەتى تابيعاتتىڭ توسىن مىنەزدەرىنە دە توتەپ بەرۋگە نەگىزدەلگەن. ياعني، سولتۇستىك باتىسقا قاراي تاۋلى جوتا، ال شىعىستان وڭتۇستىككە قاراي ارىق پەن باتپاق بوگەتتەرى بار. قامالداعى تاس قابىرعانىڭ قالىڭدىعى ءار جەردە ارقالاي بولىپ كەلەدى. جازىق جەردە 3,5 مەترگە دەيىن قالىڭداسا، جاۋ ءوتۋى قيىن تاۋلى بەتكەيلەردە 1,5 مەترگە دەيىن جۇقارادى. عيباداتحانا اۋماعى قيراتۋ مەن توناۋدان قاتتى زارداپ شەككەن. جەردىڭ بەتكى قاباتىندا شاتىر مەن كىرپىش، تاس قيراندىلارى وتە كوپ. قازبا جۇمىستارى كەزىندە 5 گرانيتتى باعاننىڭ ءتۇبىرى ساقتالعانى بەلگىلى بولدى. جانىپ كەتكەن ءدىڭگەك اعاشتىڭ قالدىعىنان قىزىل ءتۇسپەن بويالعان ۇساق فراگمەنتتەر كەزدەستى. سونداي-اق، عيبادات ورنىنىڭ شارۋاشىلىق ءبولىگى مەن باسقا دا ينفراقۇرىلىمدارى بۇگە-شىگەسىنە دەيىن زەرتتەلۋدە.
جيىندا ءسوز العان فيلوسوفيا عىلىمدارىنىڭ دوكتورى، اكادەميك عاريفوللا ەسىم شىعىس ويشىلدارىنىڭ باستاۋىنداعى اناحارسيستىڭ التايدا تۋعانىن، سوندىقتان اتا-بابا تاريحىن تانۋ وڭىردە اناحارسيس تۇلعاسى مەن مۇراسىن جانە التاي اتاۋىن ءتيىمدى ناسيحاتتاۋدان باستالاتىنىن اتاپ ءوتتى.
شەتەلدىك عالىمدار نە دەيدى؟
كونفەرەنتسيا جۇمىسىنا الىس-جاقىن شەت ەلدەردەن عالىمدار قاتىسقانىن جوعارىدا ايتتىق. ولاردىڭ دا پىكىرى سان-الۋاندىعىمەن قۇندى. لوندون ۋنيۆەرسيتەتتىك كوللەدجىنىڭ قولدانبالى ارحەولوگيا ينستيتۋتىنىڭ ديرەكتورى دومينيك پەررينگ: «بۇل باياندامالاردا قازىرگى قوعامنىڭ ارحەولوگيالىق مۇرالاردى باسقارۋىنىڭ كۇردەلىلىگىنە نازار اۋدارىلىپ وتىر. ارحەولوگيالىق تابىستاردان كەلەلى ناتيجە كۇتەمىز. ءبىز ۇلىبريتانيا مىسالىندا جانە قازاقستانداعى زەرتتەۋ ءتاجىريبەلەرى نەگىزىندە شىعىس قازاقستان وبلىسىنداعى باي مۇرانى پايدالانۋ مەن ساقتاۋدىڭ ءتيىمدى جولدارىن تالقىلادىق. ابلايكيت نىسانىنداعى جاڭا اشىلىمدار مەن وڭىردەگى باسقا دا ارحەولوگيالىق ەسكەرتكىشتەر ارحەولوگيالىق مۇرالاردى باسقارۋدى جوسپارلاۋدىڭ ۇزاق مەرزىمدى تالقىسىنا وزەك بولادى دەپ ويلايمىن»، دەدى.
ال سانكت-پەتەربۋرگ قالاسىنداعى ماتەريالدىق مادەنيەت تاريحى ينستيتۋتىنىڭ پروفەسسورى نيكولاي بوكوۆەنكو ەۋرازيا جازىعىنداعى كوشپەلى حالىقتار مادەنيەتىنە توقتالدى. ول ورال ماڭىنان تابىلعان ايرىقشا التىن بۇيىمداردىڭ ءى پەترگە جولدانۋى كوشپەندىلەردىڭ كونە وركەنيەتىنە كۇللى الەم نازارىن اۋدارعان وقيعا بولعانىن، وسىدان كەيىن قازاق دالاسىنا ەكسپەديتسيالار جىبەرىلە باستاعانىن جەتكىزدى. XVIII عاسىرداعى، اسىرەسە، ءى پەتردىڭ ءسىبىر جيناعىنان باستالاتىن ارحەولوگيالىق ماتەريالداردى سارالاي كەلگەندە، ورالدان سىبىرگە دەيىنگى ارالىقتا تۇرمىستىق مادەنيەت ءبىر-بىرىنە ۇقساعانىمەن، جەتىسۋ، ارال جانە شىعىس قازاقستانداعى ساقتار مادەنيەتى، تاسمولا مادەنيەتى، مايەمەر-پازىرىق مادەنيەتى مەن ورتا ەنيسەيدەگى تاعار، تۋۆا، موڭعوليانىڭ بۇعىلى تاس، سولتۇستىك قىتايداعى كوشپەلىلەر، ەدىل بويىنداعى سارمات جانە سولتۇستىك قارا تەڭىز ماڭىنداعى سكيف مادەنيەتىنىڭ جەرلەۋ عۇرىپتارىندا وزىندىك ەرەكشەلىكتەر بايقالادى، دەيدى ن.بوكوۆەنكو. رەسەيلىك عالىمنىڭ ايتۋىنشا، قازاقستانداعى ساقتار داۋىرىنە جاتاتىن ارحەولوگيالىق مادەنيەت ورتالىق ازيا مەن ەۋروپا مادەنيەتتەرىنىڭ اراسىن جالعاۋدا عانا ەمەس، بەعازى-ءداندىباي ىسپەتتى قولا داۋىرىنە تيەسىلى مادەنيەتپەن دە گەنەتيكالىق تۇرعىداعى ورتاق دۇنيەلەرى كوپ. سونىڭ ىشىندە رەسەيدىڭ ءسىبىر ولكەسىندەگى پازىرىق، ارجان مادەنيەتى مەن شىعىس وڭىرىندەگى بەرەل قورعاندارىنىڭ ءبىر كەزەڭگە تيەسىلى ارحەولوگيالىق تابىستارى عىلىمي تۇردە دايەكتەلدى. ساقتاردىڭ كونە مەتالل بالقىتۋ، قارۋ-جاراق سوعۋ شەبەرلىگى مەن تۇرمىس-سالتى، زەرگەرلىك مادەنيەتى، جەرلەۋ عۇرپى تاڭعالدىرماي قويمايدى. سوندىقتان كوشپەندىلىكتىڭ وركەن جايعان وشاعى رەتىندە قازاقستان اۋماعى مەن باتىس التاي، تيان-شان تاۋلارىنا دەيىنگى ارالىقتىڭ قاراستىرىلۋىنىڭ نەگىزى بار. ن.بوكوۆەنكو مادەنيەتتەردىڭ قالىپتاسۋىندا العاشقى مىڭجىلدىقتىڭ ماڭىزى وتە ۇلكەن ەكەنىن، التايدا حالىقتاردىڭ زور ءدۇمپۋى بولعانىن، وسى جەردەن باستالعان ۇلى قوزعالىس پەن كوشتىڭ سەبەبى ءالى بەلگىسىز بولىپ وتىرعانىن، ونىڭ نەگىزى كليماتتىڭ وزگەرۋى مەن جاڭا قونىس ىزدەۋدە بولۋى مۇمكىن ەكەنىن اتاپ ءوتتى.
تۇركيانىڭ يزمير قالاسىنان كەلگەن تۇركى فولكلورىنىڭ دوكتورى، ەگەي ۋنيۆەرسيتەتى جانىنداعى تۇركى الەمىن زەرتتەۋ ينستيتۋتىنىڭ پروفەسسورى مەتين ەكيچي كونە تۇركى تانىمىنداعى تۇستەردىڭ الاتىن ورنى مەن ونىڭ فيلوسوفيالىق نىشاندارى تۋرالى اڭگىمەلەدى. تۇركى الەمىندە باستاپقىدا نانىم رەتىندە پايدالانىلعان تۇستەردى قولدانۋ اياسى ۋاقىت وتە تارىلىپ، ادەبي ەڭبەكتەردە عانا كەزدەسەتىن بولدى. ماسەلەن، كونە تۇركى ۇعىمىنداعى القىزىل ءتۇس – قان، كۇن شاپاعى، وت جالىنى سياقتى تىرشىلىك بەلگىسى. ودان بارلىق دۇنيەنى وزگەرتەتىن جاراتىلىس جىلۋى مەن جارىعىن كورۋگە بولادى. «ديۋاني-لۇعات ات-تۇرىك» ەڭبەگىندە عۇنداردىڭ بايراعى مەن اسكەرىنىڭ نىشانى القىزىل ءتۇس بولعانى ايتىلادى. اتالعان ءسوزدىڭ «ال» ءتۇبىرى دە شەشىمدى جانە قۇپيا مانگە يە، دەيدى تۇركيالىق عالىم. تۇركىلىك تانىم نەگىزىندە «ال» ءتۇبىرىن جىكتەگەن مەتين ەكيچي ادام اتا مەن حاۋا انا قول سوزعان الما جەمىسىنىڭ دە العاشقىدا «كوك» اتالعانىن، كۇننىڭ نۇرىمەن پىسكەن كەزدە «القىزىل الماعا» اينالعانىن، وسى سياقتى «التاي» ءتوپونيمىنىڭ دە «التىندى تاۋ» ءسوزىنىڭ ماعىناسىن بەرۋى مۇمكىن ەكەنىن جەتكىزدى.
ءال-فارابي اتىنداعى قازاق ۇلتتىق ۋنيۆەرسيتەتىنىڭ دوكتورانتى، ۆەنگريالىق ۆەرونيكا حورۆات ماجارلار ەلىندەگى، وڭتۇستىك-شىعىس ەۋروپاداعى كونە تەمىر عاسىرىنا تيەسىلى ەسكەرتكىشتەردى ءوزى باسى-قاسىندا بولعان قازاقستاندىق قازبا جۇمىستارىنىڭ ناتيجەلەرىمەن سالىستىرا باياندادى. ونىڭ ايتۋىنشا، بۇل كوشپەندىلەر مادەنيەتىنىڭ كەڭ جاعرافيالىق كەڭىستىكتى قامتىعانىن كورسەتەدى.
البەتتە، قىرىقۇڭگىر ەسكەرتكىشى مەن ەلەكە سازىنداعى ارحەولوگيالىق قازبا جۇمىستارىنىڭ دا عىلىمي ەرەكشەلىكتەرى بار ەكەنىن ايتا كەتكەن ابزال. ءبىز الداعى ۋاقىتتا ونداعى قازبا جۇمىستارىنىڭ ناتيجەسىنە توقتالاتىن بولامىز. ەڭ باستىسى، ارحەولوگيا بيىلدان باستاپ شىعىس ءوڭىرىنىڭ نەگىزگى بويتۇمارىنا اينالاتىن بولادى. بۇل وبلىس اۋماعىنداعى ەتنوتۋريزمنىڭ دامۋىنا دا قولايلى جاعداي جاسايدى دەپ كۇتىلۋدە. وسى ماقساتتا «التاي – تۇركى الەمىنىڭ التىن بەسىگى» عىلىمي-تاجىريبەلىك كونفەرەنتسياسى ءداستۇرلى تۇردە ارحەولوگيالىق تابىستاردى جاريالايتىن حالىقارالىق مىنبەر بولماق.
دۋمان اناش،
«ەگەمەن قازاقستان»
شىعىس قازاقستان وبلىسى
پىكىر قالدىرۋ