«Mäñgilik El» ideyasın bayıtadı
Biıl öñirdiñ özgeşe häm tereñ tarihına üñilgen jıl boldı. Alğaş ret Şığıs Qazaqstan oblısınıñ 2016-2018 jıldarğa arnalğan arheologiyalıq ğılımi-zertteu jwmıstarın jürgizudi damıtu josparı jüzege asırıla bastadı. Bağdarlamağa säykes, Katonqarağaydağı Berel qorğandarında, Zaysandağı Şilikti obalarında, Wlan audanındağı Ablaykit qamal-ğibadathanasında, Abay audanındağı Qırıqüñgir eskertkişinde, Tarbağataydağı Eleke sazında qazba jwmıstarı jürgizildi. Atalğan zertteu jwmıstarınıñ nätijesi Öskemende ötken «Altay – türki äleminiñ altın besigi» halıqaralıq ğılımi-täjiribelik konferenciyası ayasında qorıtındılandı. Alqalı basqosuğa Franciya, Oñtüstik Koreya, Resey jäne Moñğoliya memleketteri elşilikteriniñ diplomattarı, Qazaqstan, Türkiya, Resey, Wlıbritaniya, Vengriya, Germaniya, Pol'şa, Qıtay elderiniñ üzdik arheologtarı men türkitanuşıları qatıstı. Şara aldında konferenciyağa qatısuşılar men öñir twrğındarı üş kiiz üyge qoyılğan qazba jwmıstarı kezinde tabılğan biregey bwyımdardı tamaşaladı. Eñ bastı jädigerler – «Altın adam» men Berel jazığındağı №11 qorğannan tabılğan jılqınıñ köşirmeleri Mädeniet sarayınıñ dälizinde jiınğa qatısuşılardı qarsı aldı. Plenarlıq otırıs barısında ğalımdar arheologiya ğılımınıñ jäne Şığıs Qazaqstanda tabılğan tarihi jädigerlerdi saqtau men onı mwrajayğa qoyudıñ özekti mäselelerin talqıladı. Arheologtardıñ pikirinşe, bwl – öñirdiñ mädeni jäne ekonomikalıq damuına, turistik infraqwrılımınıñ qalıptasuına jağımdı äser etedi.
Jiındı aşqan öñir basşısı Danial Ahmetov elimizdiñ jaña mädeni sayasatınıñ bastı strategiyası – Elbası Nwrswltan Nazarbaevtıñ «Mäñgilik El» ideyası ekenin atap ötip, altın besik – Altaydıñ adamzat mädenietiniñ köne oşaqtarınıñ biri ekenine toqtaldı.
– Ğılımi-zertteu jwmıstarın öñirimizde jürgizu qajettiligi kümän tudırmaydı. Mwnday jwmıstar zerttelgen nısandardı YUNESKO-nıñ älemdik mwralarınıñ qatarına qosu üşin qajetti teoriyalıq negizi men öñirimizdiñ mädeni brendin qalıptastırıp, turistik äleuetiniñ artuına sep bolmaq. Qazba jwmıstarınıñ nätijesinde tabılğan jädigerler oblısımızda qalıp, jastarımızdıñ patriottıq tärbiesi üşin qızmet etetin boladı, – dedi D.Ahmetov. Aymaq basşısı qazba jwmıstarı kezinde tabılğan zattardıñ oblıstıq tarihi-ölketanu mwrajayına beriletinin ayttı. Osı konferenciyadan bir kün bwrın Katonqarağay audanınıñ Berel qorğandarında elimizde balaması joq aspan astındağı mwrajay aşılğanın atap ötu kerek. Mwnday mwrajay kelesi jılı Şilikti jazığında da salınbaq.
– Biılğı qazaqstandıq arheologiyanıñ ülken jetistigi – Bereldegi №2 qorğannıñ üstine aşıq aspan astındağı muzeydiñ salınuı der edik. Öñir basşısı Danial Ahmetovtiñ qorğanmen tanısqan sätte birden şeşim qabıldağanına riza boldıq. Oblıs äkimi uädesin orındadı. Bwl – arheologiya ğılımına zor qoldau dep bilemiz. Öytkeni, bir aydıñ işinde jedel arheologiyalıq muzey salu ekiniñ biriniñ qolınan kele bermeydi. Öñir mädenieti üşin erekşe oqiğa bolğan aspanastı mwrajayınıñ keler wrpaqtı eljandılıqqa tärbieleudegi mañızı zor, – deydi Berel qorğandarına 20 jıldan beri zertteu jürgizip kele jatqan belgili arheolog Zeynolla Samaşev.
Berel bederleri
Endi biılğı jıldıñ ğılımi oljasına aynalğan arheologiyalıq qazba jwmıstarınıñ tabısı jöninde az-kem söz. Konferenciyada alğaşqılardıñ biri bolıp söz alğan Zeynolla Samaşev Altaydağı arheologiyalıq qazbalardı eki topqa bölip qarauğa bolatının ayttı. Birinşisi, erte temir däuirindegi saqtar kezeñi. Osı kezeñge tiesili №2 jäne №19 qorğanğa biıl qazba jwmıstarı jürgizildi. №2 qorğannan egde jastağı äyel mürdesi men jeti jılqı tabıldı. Patşa äuletinen şıqqandıqtan märtebesine baylanıstı adammen birge jeti jılqını qoyğan. Biraq qorğandağı altın bwyımdar tonalğan, köp zattar tabılmadı. Patşayımnıñ altınmen ädiptelgen kiiminiñ keybir jwrnaqtarı ğana saqtalıptı. Jüzdegen äşekeyden twratın altın kiiminiñ, ökinişke qaray, keybir böligi ğana qalğan. Sonday-aq, qoladan qwyılğan ayna tabıldı. Onıñ sabı jırtqış añnıñ beynesinde jasalğan. Qasına kendir dänin wntaqtaytın arnayı qwral men ıdıs qoyılğan. Patşayım köp auırğan qartañ adamğa wqsaydı. Öytkeni, qorğannan tabılğan adamnıñ tisteri sirep, omırtqa süyegi bir-birine jabısıp qalğan. Bükir adam boluı da mümkin. Älgi qwraldardı emge paydalanğan siyaqtı. Osığan wqsas qwral bwrın qazılğan qorğandardıñ birinen tabılğan edi. Qola qwtınıñ eki jağında tesigi men tütigi bar. İşinde altı-jeti malta tas jattı. YAğni kendirdiñ dänin osı ıdısqa salıp, tastı qızdırıp qwtıdağı suğa tastap jiberedi. Osılayşa, buırqanıp eki tütiginen şıqqan bumen emdelgen boluı kädik. Qattı auırğan jan bolğandıqtan o düniege barğanda em-domına qajet boladı degen oymen janına qoyğan. Sonday-aq, birneşe jılqınıñ basına äşekeyli betperde kigizilgen. Bir attıñ basında altınnan qwyğan qwstıñ beyneleri şıqtı. Bwğan deyin №10 qorğanda tabılğan attıñ er-twrmanınıñ äşekeylerinde birneşe qoraz beyneleri bederlengen bolatın. №19 qorğan da qattı tonalğan. Biraq tonauşılar qabirdegi mürdeni ayağınan süyrep tartqan kezde bas kiiminiñ bir böligi ornında qalıp qalğan eken. YAğni Esik qorğanındağı «Altın adamnıñ» bas kiimine wqsas altınnan jasalğan säukele qaldıqtarı tabıldı. Öte qızıq äri qwndı dünie. Bwl – endi boy jete bastağan jas qızdıñ mürdesi.
Ğalımnıñ aytuınşa, ekinşi topqa tiesili qorğandarda zattar az tabılğanımen, onıñ ğılımi tüyinderdi tarqatudağı mañızı zor. Bwl jerleu orındarınıñ säulettik qwrılımı erekşe bolıp keledi. Mäselen, tastan qalanğan döñgelek şeñberdiñ işine adam men attardı jäşikpen de, jäşiksiz de jerlegen. Osı obalardan ğwndar men köne türki zamanı arasındağı bos keñistikti toltıruğa qajetti qwndı materialdar tabıldı. Bwl şarttı türde sänbi-jujan kezeñi ataladı. Türkilerdi Orhonnan Altayğa köşirgen sänbiler. Türkiler temir balqıtıp, odan türli qwral-jaraqtar qwyatın. Keyin köbeyip, sanı ösken türkiler 555 jılı qojayındarın talqandap, jeke memleketin – alğaşqı Türik qağanatın qwrdı. Mine, ekinşi topqa jatatın qorğandardan İİ-IV ğasırlar aralığındağı osı sänbi-jujandarğa tiesili mädeniet jwrnaqtarı tabıldı. Olar hunnulardı talqandau arqılı tarih sahnasına köterilgen, jergilikti jwrtpen aralasıp, erekşe mädeniet jasağan halıq. Sänbilerdi prototürkiler, türkitektes halıq dep atauğa boladı, dedi Z.Samaşev.
Şilikti şejiresi
Şilikti jazığındağı saq obaların qazuğa jetekşilik jasağan äl-Farabi atındağı Qazaq wlttıq universitetiniñ professorı Äbdeş Töleubaevtıñ aytuınşa, Şilikti dalası – Şığıs öñirindegi saq eskertkişteriniñ eñ köne elitarlıq eskertkişteri ornalasqan jer. Bwl eskertkişterdi 1949-1970 jıldar aralığında keñestik arheolog S.S.Çernikov zerttedi. Täuelsizdik alğannan keyin Şilikti obaların zertteudi 2003 jıldan bastap «Mädeni mwra» jobası şeñberinde qazaqstandıq ğalımdar qolğa aldı. 2012 jılı memlekettik tapsırıs toqtap qalğandıqtan, tört jıldıq üzilisten keyin Şiliktidegi zertteu jwmıstarı arheologiyanı damıtudıñ öñirlik bağdarlaması arqılı qayta jalğastı. Ä.Töleubaev mwnda erte temir däuirine jatatın 200-ge juıq saq obaları bar ekenin ayttı. Onıñ işinde 50-ge tarta elitarlıq nemese patşa obaları bar.
Euraziya dalasında däl Şilikti jazığındağıday elitarlıq obalar tığız toptasqan aymaq öte sirek kezdesedi. Bizdiñ maqsatımız – osı obalardı zertteu. Biıl №16 obanı qazdıq. Obanıñ biiktigi – 8,6, diametri – 88 metr. Qazaqstanda osı ispetti biik, orasan iri oba sirek. Qazu barısında topıraq obanıñ astınan tas oba şıqtı. Şiliktidegi bwrın qazğan obalardıñ da sırtı topıraq bolğanımen, astınan tas oba şığatın. Tas oba astında ağaş qabirhana ornalasadı. Bwl säulettik jağınan öte erekşe qwrılımğa ie qorğan. Men osı orayda tarihi säulet jobaların zertteumen şwğıldanatın belgili ğalımdardı şaqırğanımdı aytayın. Olar oba qwrılısınıñ kürdeli äri jiti esepke qwrılğan qwrılımına tañğalğandarın jasırmadı. Oblıs äkimi Danial Ahmetov osı obanıñ säulettik erekşeligimen jäne jädigerlerimen tanısa kele, onı saqtap qalu üşin aspan astı muzeyin saluğa uäde berip otır. Eger biz bir jıl ayasında obanı jappasaq, aldağı uaqıtta onıñ ğasırlar boyı saqtalğan bet-beynesi bwzılatın boladı, dedi Ä.Töleubaev.
Ğalım obanıñ ortañğı böliginde tas üyindiniñ joqtığı – obanıñ tonalğandığın körsetetin birden-bir belgi ekendigin jetkizdi. Qazu jwmıstarın jalğastıru barısında ağaş qabirhana şıqtı. Oñtüstikten soltüstikke 6 metr, şığıstan batısqa 4 metr bolatın qabirhananıñ ağaş böreneleriniñ diametri 60 santimetrdi qwraydı. Börenelerdiñ arası tastarmen bitelgen. Bwl bwrın biz qazğan obalarğa da, Çernikov zerttegen obalar qwrılımına da wqsas, dedi ol. Qattı qiratılıp, tonalğanı belgili boldı. Qirağan soñ su ötip, ağaş şiruge şaq qalğan. Qabirde eki adam qoyılğan eken. Onıñ biri jaqsı saqtalğan. Altın bwyımdar osı qabirden tabılıptı. 2 mıñğa juıq öte wsaq, mikroskopiyalıq qoñırauşalar ispetti altın monşaqtardı topıraqtan arşıp aluğa bir ay uaqıt ketti. Odan irileu altın äşekeylerdiñ sanı 200-ge juıq. Bwl äşekeyler şaşılıp qalğandıqtan, onı jerleu kezindegi ülgisine keltiru mümkin bolmağan. Al oñ jaq qabirhanadağı adam aldıñğıday sän-saltanatpen jerlenbegen. Onıñ üstine, bası şığısqa qarap jatır. Sonday-aq, bas süyegi börenemen janşılğan. Boljam boyınşa, ol patşanıñ qwldarınıñ biri boluı mümkin nemese obanı tonauşılar süyekti audarıp tastağan. Bwl süyektiñ jöndi saqtalmauınıñ sebebi, töbesiniñ şımmen qalanuı deuge boladı. Şım ılğal ötkizetindikten ağaştı şiruge alıp keledi. Jalpı alğanda, bwl obada öte iri saq bileuşisi jerlengeni anıqtaldı.
Sonımen birge, Şilikti jazığındağı şağın obalardıñ biri sanalatın №7 qorğanda jılqımen birge jerlengen adam mürdeleri tabıldı. Ä.Töleubaevtıñ aytuınşa, jılqımen birge jerleu dästüri Şiliktide bwrın-soñdı kezdespegen bolatın. Obanıñ üstiñgi böliginde qolı men ayağı baylanğan äyel mürdesi, odan 70 santimetrdey tömende eriniñ jerlengeni anıqtaldı. Bwl da zertteudi qajet etetin tıñ jañalıqtıñ biri.
Atağı alısqa ketken Ablaykit
Belgili ğalım Karl Baypaqov ortağasırlıq Ablaykit eskertkişiniñ erekşelikteri jöninde äñgimeledi. Ol joñğar şapqınşılığı kezinde Şığıs öñirinde boy kötergen qamal-ğibadathananı zertteu ürdisin elimizdegi buddistik ilimniñ taraluı ayasında qarastıru kerektigin jetkizdi. Bir jarım mıñ jıl bwrın Ündistanda payda bolğan buddistik ilim Jibek jolı arqılı taralıp, Qıtay jäne Orta Aziya arqılı Qazaqstanğa da keldi. Elimizdiñ Europa men Aziya arasındağı jağrafiyalıq köpirlik mindeti sauda-ekonomikalıq baylanıstarğa ğana emes, dinaralıq qarım-qatınastar üşin de mañızdı röl atqardı. Qazaqstanda orta ğasırlardağı buddistik keşenderdiñ bolğanına biz jazba derekter arqılı da, arheologiyalıq qazba jwmıstarı arqılı da qol jetkizip otırmız, dedi K.Baypaqov. VII ğasırda Batıs Türik qağanatınıñ birqatar bileuşileri buddizmge qoldau körsetken. Jetisu jerindegi ortağasırlıq qalalardan da buddizm belgileri köptep tabılğanın, oyrat taypaları salğan budda lamalarınıñ ğibadat orındarı «kit-hit» atalğanın aytqan ğalım onıñ kirpişten, sabannan salınıp, ğibadat ornı bekinis, şaruaşılıq-twrmıstıq jäne twrğın-jay retinde paydalanılğanın jetkizdi. Mwnday orındar Pavlodar oblısı men Semey qalası aumağında da bolğan. Al Ablaykit bekinisin 1654 jılı Joğarğı Ertistiñ sol jağalauında, Qalba taularınıñ arasına oyrat bileuşisi Ablay täyji saldırdı. Buddalıq ğibadathananıñ qısqaşa tarihı osı. Ablaykit – XVII ğasırdıñ 50-60 jıldarında buddanıñ iri ortalıqtarınıñ biri boldı. Keyinnen Öskemen bekinisiniñ negizin qalauşı I.M.Liharevtiñ jetekşiligimen kelgen orıs otryadı ğibadathana ornınan tibet pen oyrat qoljazbalarınıñ, budda ikondarı men qola müsinderiniñ mol qorın jäne tibet-moñğol qoldanbalı-sändik öner bwyımdarın tauıp, Reseyge alıp ketedi. Bwl europalıq tibettanu ğılımınıñ negizin qalağan qwndı dünieler bolatın. Jalpı, Ablaykit turalı köptegen sayahatşı-ğalımdar jazba derekter qaldırğan. Onıñ işinde qazaq dalasın Aziyağa aşılatın qaqpa sanağan İ Petr de osı kezeñde Qazaqstan men Orta Aziyanı tanıp-biluge küş salğan. Keşenniñ saqtalıp qalğan jobasınan onıñ sol kezdegi eñ ädemi ğibadathanalardıñ biri bolğanın köruge boladı. Bwl keşen qorğanıs maqsatın közdegendikten sırtqı dualınıñ barlığı tastan qalanğan. Onıñ birşama böligi büginge deyin saqtalğan. Budda ilimin taratuşı Zaya-Panditanıñ ıqpalımen salınğan Ablaykit ğibadathanası aumağında biıl mamır ayınan beri oblıs äkiminiñ bastamasımen arheologiyalıq qazba jwmıstarı jürgizildi. Bekinis qabırğası men keşenniñ kireberisine jürgizilgen qazba jwmıstarı nätijesinde oñtüstik böligindegi jalpı aumağı 520 şarşı metr bolatın jer arşıldı. Bwl keşenniñ qorğanısqa arnalğan qwrılımınıñ jalpı wzındığı – 2125 metr. Ğibadathana astında oñtüstik jäne şığıs jağındağı twrğınjay men şaruaşılıqqa paydalanğan alañdar tas qabırğamen bölingen. Qabırğadan 50 metr jerde arıq ötedi. Osılayşa, qamaldıñ qorğanıs qabileti tabiğattıñ tosın minezderine de tötep beruge negizdelgen. YAğni, soltüstik batısqa qaray taulı jota, al şığıstan oñtüstikke qaray arıq pen batpaq bögetteri bar. Qamaldağı tas qabırğanıñ qalıñdığı är jerde ärqalay bolıp keledi. Jazıq jerde 3,5 metrge deyin qalıñdasa, jau ötui qiın taulı betkeylerde 1,5 metrge deyin jwqaradı. Ğibadathana aumağı qiratu men tonaudan qattı zardap şekken. Jerdiñ betki qabatında şatır men kirpiş, tas qirandıları öte köp. Qazba jwmıstarı kezinde 5 granitti bağannıñ tübiri saqtalğanı belgili boldı. Janıp ketken diñgek ağaştıñ qaldığınan qızıl tüspen boyalğan wsaq fragmentter kezdesti. Sonday-aq, ğibadat ornınıñ şaruaşılıq böligi men basqa da infraqwrılımdarı büge-şigesine deyin zerttelude.
Jiında söz alğan filosofiya ğılımdarınıñ doktorı, akademik Ğarifolla Esim Şığıs oyşıldarınıñ bastauındağı Anaharsistiñ Altayda tuğanın, sondıqtan ata-baba tarihın tanu öñirde Anaharsis twlğası men mwrasın jäne Altay atauın tiimdi nasihattaudan bastalatının atap ötti.
Şeteldik ğalımdar ne deydi?
Konferenciya jwmısına alıs-jaqın şet elderden ğalımdar qatısqanın joğarıda ayttıq. Olardıñ da pikiri san-aluandığımen qwndı. London universitettik kolledjiniñ qoldanbalı arheologiya institutınıñ direktorı Dominik Perring: «Bwl bayandamalarda qazirgi qoğamnıñ arheologiyalıq mwralardı basqaruınıñ kürdeliligine nazar audarılıp otır. Arheologiyalıq tabıstardan keleli nätije kütemiz. Biz Wlıbritaniya mısalında jäne Qazaqstandağı zertteu täjiribeleri negizinde Şığıs Qazaqstan oblısındağı bay mwranı paydalanu men saqtaudıñ tiimdi joldarın talqıladıq. Ablaykit nısanındağı jaña aşılımdar men öñirdegi basqa da arheologiyalıq eskertkişter arheologiyalıq mwralardı basqarudı josparlaudıñ wzaq merzimdi talqısına özek boladı dep oylaymın», dedi.
Al Sankt-Peterburg qalasındağı Materialdıq mädeniet tarihı institutınıñ professorı Nikolay Bokovenko Euraziya jazığındağı köşpeli halıqtar mädenietine toqtaldı. Ol Oral mañınan tabılğan ayrıqşa altın bwyımdardıñ İ Petrge joldanuı köşpendilerdiñ köne örkenietine külli älem nazarın audarğan oqiğa bolğanın, osıdan keyin qazaq dalasına ekspediciyalar jiberile bastağanın jetkizdi. XVIII ğasırdağı, äsirese, İ Petrdiñ Sibir jinağınan bastalatın arheologiyalıq materialdardı saralay kelgende, Oraldan Sibirge deyingi aralıqta twrmıstıq mädeniet bir-birine wqsağanımen, Jetisu, Aral jäne Şığıs Qazaqstandağı saqtar mädenieti, tasmola mädenieti, mayemer-pazırıq mädenieti men Orta Eniseydegi tağar, Tuva, Moñğoliyanıñ bwğılı tas, Soltüstik Qıtaydağı köşpeliler, Edil boyındağı sarmat jäne Soltüstik Qara teñiz mañındağı skif mädenietiniñ jerleu ğwrıptarında özindik erekşelikter bayqaladı, deydi N.Bokovenko. Reseylik ğalımnıñ aytuınşa, Qazaqstandağı saqtar däuirine jatatın arheologiyalıq mädeniet Ortalıq Aziya men Europa mädenietteriniñ arasın jalğauda ğana emes, beğazı-dändibay ispetti qola däuirine tiesili mädenietpen de genetikalıq twrğıdağı ortaq dünieleri köp. Sonıñ işinde Reseydiñ Sibir ölkesindegi Pazırıq, Arjan mädenieti men Şığıs öñirindegi Berel qorğandarınıñ bir kezeñge tiesili arheologiyalıq tabıstarı ğılımi türde däyekteldi. Saqtardıñ köne metall balqıtu, qaru-jaraq soğu şeberligi men twrmıs-saltı, zergerlik mädenieti, jerleu ğwrpı tañğaldırmay qoymaydı. Sondıqtan köşpendiliktiñ örken jayğan oşağı retinde Qazaqstan aumağı men Batıs Altay, Tyan'-Şan' taularına deyingi aralıqtıñ qarastırıluınıñ negizi bar. N.Bokovenko mädenietterdiñ qalıptasuında alğaşqı mıñjıldıqtıñ mañızı öte ülken ekenin, Altayda halıqtardıñ zor dümpui bolğanın, osı jerden bastalğan wlı qozğalıs pen köştiñ sebebi äli belgisiz bolıp otırğanın, onıñ negizi klimattıñ özgerui men jaña qonıs izdeude boluı mümkin ekenin atap ötti.
Türkiyanıñ Izmir qalasınan kelgen türki fol'klorınıñ doktorı, Egey universiteti janındağı türki älemin zertteu institutınıñ professorı Metin Ekiçi köne türki tanımındağı tüsterdiñ alatın ornı men onıñ filosofiyalıq nışandarı turalı äñgimeledi. Türki äleminde bastapqıda nanım retinde paydalanılğan tüsterdi qoldanu ayası uaqıt öte tarılıp, ädebi eñbekterde ğana kezdesetin boldı. Mäselen, köne türki wğımındağı alqızıl tüs – qan, kün şapağı, ot jalını siyaqtı tirşilik belgisi. Odan barlıq dünieni özgertetin jaratılıs jıluı men jarığın köruge boladı. «Diuani-lwğat at-Türik» eñbeginde ğwndardıñ bayrağı men äskeriniñ nışanı alqızıl tüs bolğanı aytıladı. Atalğan sözdiñ «al» tübiri de şeşimdi jäne qwpiya mänge ie, deydi türkiyalıq ğalım. Türkilik tanım negizinde «al» tübirin jiktegen Metin Ekiçi Adam ata men Haua ana qol sozğan alma jemisiniñ de alğaşqıda «kök» atalğanın, künniñ nwrımen pisken kezde «alqızıl almağa» aynalğanın, osı siyaqtı «Altay» toponiminiñ de «altındı tau» söziniñ mağınasın berui mümkin ekenin jetkizdi.
Äl-Farabi atındağı Qazaq wlttıq universitetiniñ doktorantı, vengriyalıq Veronika Horvat Majarlar elindegi, Oñtüstik-Şığıs Europadağı köne temir ğasırına tiesili eskertkişterdi özi bası-qasında bolğan qazaqstandıq qazba jwmıstarınıñ nätijelerimen salıstıra bayandadı. Onıñ aytuınşa, bwl köşpendiler mädenietiniñ keñ jağrafiyalıq keñistikti qamtığanın körsetedi.
Älbette, Qırıqüñgir eskertkişi men Eleke sazındağı arheologiyalıq qazba jwmıstarınıñ da ğılımi erekşelikteri bar ekenin ayta ketken abzal. Biz aldağı uaqıtta ondağı qazba jwmıstarınıñ nätijesine toqtalatın bolamız. Eñ bastısı, arheologiya biıldan bastap Şığıs öñiriniñ negizgi boytwmarına aynalatın boladı. Bwl oblıs aumağındağı etnoturizmniñ damuına da qolaylı jağday jasaydı dep kütilude. Osı maqsatta «Altay – türki äleminiñ altın besigi» ğılımi-täjiribelik konferenciyası dästürli türde arheologiyalıq tabıstardı jariyalaytın halıqaralıq minber bolmaq.
Duman ANAŞ,
«Egemen Qazaqstan»
Şığıs Qazaqstan oblısı
Pikir qaldıru